رعد دكالــــــــــــي\هولنــــدا

 

انتوا أللي رشحتوا نفسكم للانتخابـــــــــــــــــــــات

دوختونا ودوختوا العالم بالدعايـــــــــــــــــــــات

تنشرون بهاي الصور وهاي البوستــــــــــــــــرات

وتكعدون بالفضائيات وتسوون لقـــــــــــــــــــــاءات

وتحجون منا ومنا وتعقدون مؤتــــــــــــــــــــــمرات

وماشفنا واحد يحجي الصدك كلـهـــــــــا كــــلاوات

وتظلون توجهون  لغيركم انتقادات واتهامــــــــــات

وانتم كلكم بيكم  اخطاء وملايين الغلطـــــــــــــــات

وتمدحون بنفسكم عبالك انتم باشـــــــــــــــــــوات

لو نسالكم شنو قدمتم للشعب من خدمات؟؟؟؟؟؟؟؟؟

شقدمتم غير العبوات والمفخخـــــــــــــــــــــــــــــات

وترستوا شوارع بغداد جثث وحولتوها الى مقبرات

الكهرباء... أشو عمت عيون الشعب من اللالات

ألمي...اشو ديشرب من السواقي ونسا اكو دجلة وفرات

والشوارع كلها حفر ومطبات وطســــــــــــــــــــــات

التموينية مابيها غير الجاي الفاسد وشوي تمنــــات

الرواتب انتم تقبضون مليارات والشعب فليســات

ألامان يوميا يموتون بالعشـــــــــــــــــــــــــــــــرات

والتمييز اشو خليتوها بالجلاليق والكفخــــــــــــــات

جنكم..ذئاب الغابة تأكلون بالاقلـــــــــــــــــيات

وحتى المقعد الواحد صار عليهم بالحصــــــــــــــرات

عمي ........يا انتخابات خليتوها التهابات التهابات

سبع سنين وانتم تبوكون

سبع سنين وانتم تقتلون

سبع سنين وانتم تميزون

يوم ويا الشعب والف ويا المجرمون

بربكم انتم هم حكومة انتم؟؟؟؟

اسمعوا الفضائيات واراء الناس بيكم

اصغرهم يلعنكم ويشتمكم ويلومكم

واليوم تردون الشعب ينتخبكم؟؟؟؟

احنا مو ضد الانتخابــــــــــــــــــــــــــــات

الشعب والعراق بحاجة الى خدمــــــــــــات

ويريد رجال مو بس حجايــــــــــــــــــات

حتى يرجع العراق صدك بلد الحضارات

مو مثل ما سموا بلد المفخخات::::::::::

ويعيش العراقي مذلول هنا وهناك عل صدقات

من بعض الدول اللي جانت تسمي العراق بلد الخيرات

 

 

واقول لك ياعراق تبقى مكرما ومعززافي قلوبنا مادمنا نخاف عليك

نحن نحميك بجفون عيوننا

رعـــــــــد دكالي