مقدمة /
يا (داعشَ) الموت أنّى الموتُ يأتينا ... نحنُ عراقيين نبقى مسيحيينا
هذي هُويتــــنا ، من زمن كُتبت ... يوم الصليب قد قلنا آمــــينا
مذ قام المخلصُ ، بانت رسالتنا ... هذي المسيحية ُ صارت لنا دينا
تبـــــارك الله رب الكون عزته ... مهما احتشدت علينا فهو يحمينا
**
القصيدة /
يا داعشي يامجنون – مخبول انت ومأبون
انت موبس مرض تسري – انت اخطر من طاعون
بس ارد اگول للدخلك – ولجابك هذا الملعون
وخلاك تسرح بالبلد – تقتل وتسبي تذبحون
يا اهلنا ، يا جارنا ، يا حيّنا گولولي شنهو المضمون
نسيتوا المسيحي شكد خدم وصرتوا بسرعة تنسون
اتذكروا سنين المضت – إبفد محلة تسكنون
يا ناس شنهو المسألة - اشجاكم گلبتوا الكون
جيران (وصاكم گبل) – ولسابع جار من تحجون
تذكرون من چنتو أهل – بفد بيت چنتو تسكنون
وبيناتكم زاد وملح – وما بيكم اللي يحسدون
انحب سوة ، ونفرح سوة ونحزن سوة وما بينا اللي يكرهون
واولادنا بفد مدرسة – بام المعونة يدرسون
وأيام شمعون الصفا – بهنام يدرس سعدون
وبالعيد انعيد سوة – او ناكل بفد ماعون
ومريمنا من تمتحن – تصعد ركض تدرون
وي فاطمة العصر – فوگ السطح يقرون
ليش اسكتواعالظلم – وجيرانكم ينطردون
**
اسلام انصير بغصب – تريدون لوما تريدون
وبناتنا يصيرن سبي – ونسوانا يُغتصبون
والجزية لو ما تندفع – الراسنا يگطعون
وقبور اهلنا تنهدم – مدفون فوگاه مدفون
وبيوت الله تنهجم – إمن الله متخافون؟
كنايسنا ومعابدنا وجوامعنا – گولولي وين يصلون
وتاليها نتهجول طرد - وتسمونا اهل النون
**
احنا البنيناه للبلد – وشلنا اغصان الزيتون
واحنا العلم واهل الأدب – واهل الرياضة والفنون
واحنا الحضارة والعقل ونفرح ويا اليفرحون
ولو الوطن صابه جرح احنا اول اللي يحزنون
تاليها تنسون المضى .. وداعش بينا يتعشون
**
بس يا مسيح تبقى الأمل ..انت اللي خلصت الكون
خلي سلامك بالبلد ، وأهلنا خلّي يرجعون