|
لعد ياهو ... كاعد يكتل بالمسيحيين..!!
نحجي بالعراقي يتمنى البعض ان يشهد العراق خروج اخر مسيحي....ويجوز تتحقق طول ما الحكومة غير قادره على الوقوف بوجه التطرف الديني لان بالاذاعات والتلفزيونات ديكولون انه احنا نحترم كل ابناء العراق بليّه تفرقه بين هذا الدين وذاك الدين ومن جوه العبايه يهمشوهم واذا نكرو فبرلمانكـم ( شاهد مشافش حاجه) ليش ما تفصحون ما بداخلكم وتريحونا وكولو احنه نريد ( دولة القرون الوسطى) وكولو للمسيحيين اطلعـو وشوفولكم بلد غير بلدكم الاصلي حتى يلفهم بلد ثاني. واتمنى ان اكون غلطان وكاعد اتفلسف براسكم. اني ما مصدك انه الخطة الامنية مال (الحكومة الرشيده كولش) إللي جابت وجرَّتْ الذيب من ذيله وكتلت ولزمت يومية كومة من الارهابيين على مدى خمس سنوات الى حد ما ظل اي ارهابي بالعراق..!! بس كل فترة واخرى يكتلون لو يختطفون واحد مسالم من المسيحيين لا بيها ولا عليها ومالهم علاقة بالصراعات والتناحرات على الكراسي والبلاوي. طبعا لان الجماعات المسلحة (المجاهدين كلش) شادين قايش علمسيحين المساكين لانهم ما عدهم ظهر ولا ميليشيات ولا مرجعيات ولا دول توكف بظهرهم يعني ماعدهم حزام ظهر.. فكلمن يريد يهف جم فلس يشتغل بهل شغله يروح يخطف بهل ولد الخايبه وياخذون فليساتهم وهكذا دواليك يعني يحلبوهم حلب ويطلبون جم دفتر لو ينذبح على طريقتهم اللي تعرفوها زين... وهسه لو تكمش مسيحي واحد تضربه بالكاع وتعصر مصارينه مايطلع بجيبة دفتر ( والدفتر للي مايعرفه هو عشرة الاف دولار امريكي ) وجماله الـ ( UN) ترفض طلباتهم من يكولون احنا خلصنا بارواحنا بجم دفتر ودفعنا جزية حتى يهدونا فـ ( UN) تكللهم انتو بهل العملية تشجعون الارهاب واحنا نرفضكم.
تصدكون لو ما تصدكون !! انو حكومة المحاصصه الطائفية هَمْ هـُمَّ شادين قايش علمسيحيين وبقية الاقوام الاخرى، اقوام بلاد الرافدين الاصلاء كالصابئه، ويحسبوهم طليان يسوكون بيهم كالخرفان وابسط دليل قاطع انه حكومتنا الرشيدة شرعت نظام (الكوتا) وبعدين قررت الغاء (حقوق الاقليات) وهو جم كرسي لو اثنين لو تلاثه وشيشكلون هلكراسي قابل فد قوة ضاربه لو قوة صاروخية وبهل كراس الطركاعه اشتغل عليهم الفلم من السيناريو الى اخراجه للواقع فانتو ياحكومة ليش تنطون حقوق للاقليات وبعدين تلغوها؟ خوب من الاول كلولهم انتو ماعدكم لا ناقة ولا جمل بهالبلد وطلعوا منه.. وانا ادري بس يطلع هلمقال راح جم واحد يخابرني ويكلني نعرف انت ليش ادافع عن المسيحيين.. جيف انت مسيحي .. واني اكللكم وافر إلكم المكالمه واكـول إلـي ما يدافع عن عائلته مايكدر يدافع عن وطنه..؟؟!! وانوب من كاموا وطلعو بمسيرات احتجاج كامت الدنيا علمسيحين وحيل نزلو بيهم كتل وترهيب وتهديد وعيني عينك وبمكبرات مال الصوت وجماله بسيارات مال الحكومة وبهدوم مال الحكومة والحكومة دكول احنا ما نايمين لعد وين جنتو تلعبون ( بوكر مشين) الي بس عدنا هنا شفناه باستراليا وارجع واسأل لعد يا هو كاعد يكتل بالمسيحيين. اكو شغله ما تغش بعقلي ولا هي منطقيه وهي : اكو جماعة ومن المسيحيين بالتحديد يكولون سبب هل البلاوي الي إجت براسنا هو مطالبة سركيس اغاجان بالحكم الذاتي.. يعني حكم ذاتي بنفس مناطقهم الي يسكنوها الان ..يعني مراح ياخذون كاع مال غيرهم .. كاعهم ومن حقهم ان يحكموا ويحموا أنفسهم، قابل هذا الحجي حرام وللغير حلال على الطريقة السعودية يو الايرانية يو البرتكيشيه،... طيب نجي وياكم ونفترض كلامهم صح.. بس اسئلهم بربهم من اجو البعثيين بسنه 1963م وطاحو كتل بالمسيحيين هم جانو يطالبون بالحكم الذاتي..؟! زين هاي ما مقنعه ليش عبد السلام محمد عرف ريس الجمهورية العراقية ( الي مات موته الهنود) وكف أباب سجـن الموصل وبيه مساجين سياسيين، من بعثيين وشيوعيين وغيرهم وكف وكال بعظم لسانه :( بعد ماكــو لا ججو ولا مجو) هم جانو يطالبون بالحكم الذاتي..؟! وخال ( سيد الريس) خيرالله طلفاح كان معادي جدا لكل ماهو مسيحي والي بعمرنا يعرف هذا الشخص.. هم جانو يطالبون بالحكم الذاتي..؟! ومن جانو المسيحيين الي عاشو بناحية الحقلانية وقضاء حديثة ومحطة كي ثي (k3)، وH2 وT1 التابعة لمحافظة الانبار، جان قسم من المسيحيين ( وواحد منهم كاتب هذه السطور) يعيشون بدربونه بناحية الحقلانية كان يسموها دربونه المسيحيين ومن كتلو عبدالكريم قاسم، الف رحمه على روحه، واجو الحرس اللاقومي للحكم في ولاية البعث الاولى عام 63، ليش هجمو على المسيحيين وشردو لبغداد..؟! هم جانو يطالبون بالحم الذاتي..؟؟!! وبعدين من ضرب عبد السلام البعثيين ليش طاحو بينا جلاليق ودفرات وكيبلات وداعيكم استلم منهم كيبل مازال اثره على جتفي الايسر المخلوع ..هم جانو يطالبون بالحكم الذاتي..؟! زين خلونا مهل حجي ونجي لعام 1837م من كام علي محمد الراوندوزي الملقب (بميره كور) وهجم بجيشه على قرى مال مسيحيين وذبح منهم اكثر من 400 شخص بكنيسة مار كوركيس وحتى من سمع صوت طفل بالمهد اجه وقعطع راسه حتى لا يطالب بالحكم الذاتي وما زالت كنيسة مار كوركيس في كرمليس شاهد على ما اقول هم هذوله كانوا يطالبون بالحكم الذاتي ..؟! ومن نصبو مدافع على جبل القوش الشامج بزمن النطام الملكي لقصف القوش البطلة بسبب ايواءهم اخوة لهم من الاثوريين الهاربين من مذابح سميل هم هذوله كانو يطالبون بالحكم الذاتي .. والي هسه واكفين بالضد من هل فكره لو نكلهم تعالو انتم صيرو واستلمو حكومة الحكم الذاتي ( من وزراء ورؤساء السلطات التشريعية والتنفيذية والقضائية والبرلمانية والامنية والاعلامية والصحة والمالية و..الخ) هم يرفضون لو يصير الواحد منهم عنتر بن شداد لو شمشوم الجبار ..؟ كافي ضحك علذقون تره اخوتكم مفتحين باللبن وما نقبل تلعبون بينا لعب وتتحالفون مع اعداء بني جلدتكم وما نقبل احد يضحك علينا وما نقبل احد يحكمنا وربعنا اغلبهم علماء واطباء ومهندسين وادباء وفنانيين وماكو مهنه مناجحين بيها.. والله كـده وكدود ويفلشون جبال.. بعدين من حق كل الشعوب وخاصة شعب بلاد النهرين الاصليين اصحاب حضارة سومر واشور وبابل الي سقطت دويلاتهم بعشرات الغزوات والي سمو قسم منها (فتوحات) .. ما إلهم حق ان يعيشو في مناطقهم الي يسكنوها الان وما يريدون شي منكم لا اراضي الي استوليتو عليها سابقا ولا لاحقا وما يريدون ياخذون حقهم بالعركه (معركه) يعني هناك جم قريه وجم ناحية يعيشون بيها لحد الان ليش ينحكمون بفد واحد من اخوانا من العرب لو الكورد جا هما شمالهم ما عدهم زلم وعقول والله تارسين العالم بعبقريتهم وانتم قبل الدول الاخرى تشهدون الهم. كل الاحزاب، العلمانيه والدينية والارهابية كولهم كالو مو احنه وما إلنا علاقة بالموضوع مسيحي الموصل لابل اسنكرو وبشده قتل المسيحيين وهسه ارجع واسأل: لعد ياهو كاعد يكتل بالمسيحيين....؟؟!! بعدين اكلكم لو نفترض كل المسيحيين بالعـراق طلعـو وشردوا بره.. قابل راح تنحل مشاكل العراق المعقده مثل عقده (اوديب) وتنحل مشكلة كركوك وماراح الاكراد والعرب يتعاركون بيناتهم .. وتركيا وايران مراح يفكرون باحتلال العراق كل ِّ بطريقته الخاصة وهم (المجاهدين) في تنظيم القاعدة و(الدولة الاسلاميه والجيش الاسلامي) راح يدخلون بالحكومة كشريك وحسب المحاصصه..!! والنفط مراح تاخذه امريكا وراح تطلع وتعوف العراق، وكاع العراق راح تصير خضرة مثل منطقة حكامنا الخضراء.. واني اكول : العــراق يبقه صحراء بليـّه مسيحيين وصابئه وتركمان وأرمن وشبك واليزيديه والي ما يصدك هذا الحجي فاقره السلام على العـراق وعلى اهل العـراق وعلى حضارة العراق. واني دا اكتب بهل الاسطر الاخيره وصلتني بعض التحليلات ما تعرف راسها من رجليها.. فقسم من العرب يذب مشكلة المسيحيين براس الاكراد إلي شردو المسيحيين يمهم والاكراد يذبوها براس العرب الشوفينيين وصارت القضية مثل الطوبه واحد يذبها بسلة الاخر... اذا كلهم هسه يكولون احنه براء من دم المسيحيين وارجع واسأل: لعد ياهو ...كاعد يكتل بالمسيحيين..!!
بقلم : موفق ساوا *رئيس تحرير جريدة العراقية الاسترالية |