ܡܼܢ ܡܲܬ̈ܠܐ ܕܡܠܦܢܐ ܓܝܼܘܪܓܝܼܤ ܐܪܒܝܼܠܝܐ
♱ ܚܲܕ݇ ܟܸܐ ܝܵܕܥܝܼܠܗ݇ܘܼܢ ܟܠܵܝ̈ܗܝ ܟܬܵܒܸ̈ܐ ܘܡܗܝܼܪܵܐ ܝ݇ܠܸܗ ܒܦܝܼܠܵܤܘܼܦܘܼܬܵܐ: ܘܐ݇ܚܸܪ݇ܢܵܐ ܐܸܢ ܠܵܐ ܗܵܘܝܵܐ ܗ݇ܘ̣ܵܐ ܕܡܘܼܬܸܗ ܐܲܝܟܼ ܒܲܪܢܵܫܵܐ: ܗܲܝܘܵܢܸ̈ܐ ܪܵܒܵܐ ܒܘܼܫ ܨܦܵܝ ܝܼܢܵܐ ܡܸܢܸܗ܀
♱ ܚܲܕ݇ ܟܸܐ ܐܵܟܼܸܠ ܒܘܼܫܵܠܵܐ، ܘܟܸܐ ܦܵܐܸܫ ܡܝܘܼܩܪܵܐ ܐܲܝܟܼ ܡܲܠܟܵܐ. ܘܐ݇ܚܸܪ݇ܢܵܐ ܠܝܼܬܠܸܗ ܐܘܼܦ ܝܵܪܩܵܐ: ܘܠܵܐ ܚܵܠܵܐ ܕܛܵܡܸܫ ܓܵܘܸܗ ܠܲܚܡܵܐ܀
♱ ܚܲܕ݇ ܟܸܐ ܡܲܪܕܝܼܚܝܼܠܸܗ ܚܲܡܪܵܐ ܘܕܸܒܼܫܵܐ ܗܲܠ ܕܩܵܐܸܡ ܡܼܢ ܫܒܼܝܼܬܸܗ. ܘܐ݇ܚܸܪ݇ܢܵܐ ܒܸܨܝܵܡܵܐ ܝ݇ܠܸܗ ܘܟܸܐ ܐܵܟܼܸܠ ܓܸܠܵܐ ܡܲܪܝܼܪܵܐ܀
♱ ܚܲܕ݇ ܟܸܐ ܐܵܟܼܸܠ ܓܲܪ̈ܕܲܝܸܐ ܓܒܼܝܼ̈ܠܸܐ ܒܡܸܫܚܵܐ: ܘܩܵܐ ܐܵܚܘܼܢܘܵܬ̈ܘܼܗܝ ܟܸܐ ܡܵܐܟܼܸܠ ܠܲܚܡܵܐ ܒܲܪܘܼܙܵܐ. ܘܗ̇ܘ ܐ݇ܚܸܪ݇ܢܵܐ ܟܸܐ ܐܵܟܼܸܠ ܦܲܪ̈ܬܘܼܟܼܸܐ ܕܦܵܝܫܝܼ ܡܼܢ ܝܵܬܘܼܡܸ̈ܐ ܘܐܲܪ̈ܡܵܠܝܵܬܸـܐ܀
♱ ܚܲܕ݇ ܟܸܐ ܒܲܥܝܸܗ ܕܐܵܟܼܸܠ ܒܘܼܫ ܙܵܘܕܵܐ ܐܝܼܢܵܐ ܠܝܼܬ ܦܝܵܫܵܐ ܕܘܼܟܬܵܐ ܓܵܘ ܤܛܘܼܡܟܸܗ. ܘܗ̇ܘ ܐ݇ܚܸܪ݇ܢܵܐ ܙܲܒܘܼܢ ܝܼܠܸܗ ܡܼܢ ܚܲܝܠܸܗ: ܘܡܼܢ ܟܸܦܢܵܐ ܐܘܼܦ ܠܲܚܡܵܐ ܠܹܐ ܡܵܨܸܗ ܕܐܵܟܼܸܠ܀
♱ ܚܲܕ݇ ܒܲܝܬܸܗ ܡܸܠܝܵܐ ܝ݇ܠܸܗ ܡܼܢ ܒܸܥܸ̈ܐ ܘܬܲܗܵܪܸ̈ܐ ܕܦܝܹܟܸ̈ܐ. ܘܗ̇ܘ ܐ݇ܚܸܪ݇ܢܵܐ ܡܸܪܥܝܵܐ ܘܡܫܲܘܘܼܬܵܐ ܝ݇ܠܸܗ ܠܩܲܠܦܸ̈ܐ ܕܐܵܢܝܼ̈ ܘܠܹܐ ܝ݇ܠܸܗ ܡܲܫ̄ܟ̰ܘܼܚܵܝܗܝ܀
♱ ܚܲܕ݇ ܐܝܼܡܵܢ ܕܫܲܡܥܸܗ ܩܵܠܵܐ ܕܢܵܩܘܼܫܵܐ ܟܸܐ ܡܲܥܒܼܸܪܸܗ ܪܸܫܸܗ ܓܵܘܵܐ ܕܥܘܼܒܸܗ. ܘܗ̇ܘ ܐ݇ܚܸܪ݇ܢܵܐ ܟܸܐ ܪܵܥܸܫ ܘܩܵܐܸܡ ܠܩܵܠܵܐ ܕܩܵܪܘܼܘܵܐ܀
♱ ܚܲܕ݇ ܟܸܐ ܡܫܵܠܸܚ ܩܲܒܼܪ̈ܵܘܵܬܸـܐ ܕܡܝܼܬܸ̈ـܐ، ܘܠܹܐ ܢܵܚܸܦ ܡܼܢ ܡܵܪܸܗ. ܘܗ̇ܘ ܐ݇ܚܸܪ݇ܢܵܐ ܟܸܐ ܚܵܢܸܛ ܡܝܼܬܸ̈ـܐ ܘܡܤܵܩܸܠܗ݇ܘܼܢ ܘܡܲܬܸܒܼܠܗ݇ܘܼܢ ܓܵܘ ܩܲܒܼܪܵܐ܀
♱ ܚܲܕ݇ ܐܝܼܠܸܗ ܡܤܲܚܒܸܪܵܢܵܐ ܠܡܲܪ̈ܥܵܢܸܐ، ܘܟܸܐ ܡܤܲܚܒܸܪ ܠܐܲܤܝܼܪܸ̈ܐ، ܘܠܛܪ̈ܝܼܕܸܐ ܘܠܡܘܼܠܝܸ̈ܨܸܐ. ܘܗ̇ܘ ܐ݇ܚܸܪ݇ܢܵܐ ܟܸܐ ܡܲܫܬܸܗ ܤܲܡܡܵܐ ܕܡܵܘܬܵܐ ܩܵܐ ܕܩܵܛܸܠ ܠܐܵܚܘܼܢܸܗ ܒܚܲܤܵܡܘܼܬܵܐ܀
♱ ܚܲܕ݇ ܟܸܐ ܠܵܒܼܸܫ ܥܲܡܪܵܐ ܡܘܼܤܠܝܼܵܐ، ܘܟܸܐ ܥܲܡܪܵܐ ܒܝܼܸܗ ܪܘܼܚܵܐ ܕܩܘܼܕܫܵܐ. ܘܗ̇ܘ ܐ݇ܚܸܪ݇ܢܵܐ، ܟܸܐ ܠܵܒܼܸܫ ܐܲܒܪܝܼܤܝܼܡ ܘܟܸܐ ܥܵܡܸܪ ܒܠܸܒܸܗ ܤܵܛܵܢܵܐ܀
♱ ܚܲܕ݇ ܟܸܐ ܟܵܬܸܒܼ ܐܸܫܛܵܪܸ̈ܐ ܕܕܘܼܓܠܸ̈ܐ، ܩܲܕ ܫܵܩܸܠ ܡܸܢܕܝܼ ܕܚܲܒܼܪܸܗ. ܘܐ݇ܚܸܪ݇ܢܵܐ ܟܸܐ ܤܵܪܸܛ ܠܐܸܫܛܵܪܸ̈ܐ ܕܕܲܝܢܸ̈ܐ ܕܐܝܼܬ ܥܲܠ ܐܵܚܘܼܢܘܵܬ̈ܘܼܗܝ܀
♱ ܚܲܕ݇ ܟܸܐ ܟܵܬܸܒܼ ܐܸܓܲܪ̈ܝܵܬܸـܐ ܘܓܵܘܵܝ̈ܗܝ ܟܸܐ ܡܛܵܡܸܪ ܤܲܡܡܵܐ ܕܡܵܘܬܵܐ. ܘܐ݇ܚܸܪ݇ܢܵܐ ܟܬܲܒܼܝܵܬܸ̈ـܐ ܕܐܝܼܕܘܼܗܝ ܟܸܐ ܗܵܘܝܼ ܥܸܠܬܵܐ ܕܫܠܵܡܵܐ܀
♱ ܚܲܕ݇ ܟܸܐ ܢܵܕܸܪ ܢܸܕܪܸ̈ܐ ܕܗܵܘܝܼܠܸܗ ܒܢܘܼܢܸ̈ܐ، ܘܟܸܐ ܡܵܐܸܬ ܓܵܘ ܕܐܵܗܵܐ ܚܲܫܵܐ ܕܠܵܐ ܝܵܪܘܼܬܵܐ. ܘܗ̇ܘ ܐ݇ܚܸܪ݇ܢܵܐ ܟܸܐ ܥܵܪܸܩ ܡܸܢܵܝܗܝ ܡܼܢ ܒܲܨܘܼܪܘܼܬܵܐ ܕܕܲܒܪܵܐ܀
♱ ܚܲܕ݇ ܒܕܵܝܸܡܘܼܬܵܐ ܟܸܐ ܫܵܬܸܗ ܚܲܡܪܵܐ ܘܠܹܐ ܫܵܠܸܗ ܡܼܢ ܡܸܫܬܘܼܬܵܐ. ܘܐ݇ܚܸܪ݇ܢܵܐ ܟܸܐ ܫܵܬܸܗ ܕܸܡܥܸ̈ܐ ܕܥܲܝܢܘܼܗܝ ܐܲܝܟܼ ܨܸܗܝܵܐ ܠܡܝܼܵܐ܀
♱ ܚܲܕ݇ ܕܒܼܝܼܩܵܐ ܚܘܼܛܪܵܐ ܕܡܲܠܟܘܼܬܵܐ ܕܐܝܼܠܸܗ ܡܛܘܼܪܨܵܐ ܡܼܢ ܕܲܗܒܼܵܐ ܨܸܦܝܵܐ. ܘܗ̇ܘ ܐ݇ܚܸܪ݇ܢܵܐ ܠܝܼܬܠܸܗ ܐܘܼܦ ܩܲܝܤܵܐ ܕܒܝܼܸܗ ܡܒܲܪܚܸܫ ܠܬܲܢܘܼܪܵܐ܀
♱ ܚܲܕ݇ ܐܝܼܬܠܸܗ ܩܘܼܠܒܵܐ ܕܕܲܗܒܼܵܐ ܘܐ݇ܤܝܼܪܵܐ ܚܵܨܸܗ ܒܬܲܤܡܵܐ ܕܤܸܐܡܵܐ. ܘܗ̇ܘ ܐ݇ܚܸܪ݇ܢܵܐ ܐ݇ܤܝܼܪܵܐ ܒܩܵܘܕܸ̈ܐ ܘܫܸܫܸܠܝܵܬܸ̈ـܐ܀