ܒܝܕ ܡܫܡܫܢܐ: ܝܘܤܦ ܢܘܼܪܘܼ
ܩܵܡܘܼܕܝܼ ܟܸܐ ܝܵܗ݇ܒܼܵܚ ܛܘܼܒܼܵܐ ܩܵܐ ܡܲܪܝܲܡ ܒܬܼܘܼܠܬܵـܐ؟.
ܟܹܐ ܝܵܗ݇ܒܼܵܚܠܵܗ̇ ܛܘܼܒܼܵܐ ܒܗ̇ܝ ܕܗܘܸܐܠܵܗ̇ ܝܸܡܵܐ ܩܵܐ ܡܵܪܲܢ. ܟܹܐ ܝܵܗ݇ܒܼܵܚܠܵܗ̇ ܛܘܼܒܼܵܐ ܒܘܼܬ ܚܵܬܸܪ ܕܢܛܲܪܬܘܿܗ̇ ܠܒܬܼܘܼܠܘܼܬܘܿܗ̇: ܘܒܘܼܬ ܚܵܬܸܪ ܗܲܝܡܵܢܘܼܬܘܿܗ̇: ܘܒܘܼܬ ܚܵܬܸܪ ܕܚܲܝܘܿܗ̇ ܕܡܘܼܥܒܼܸܪܵܝܠܵܗ̇ ܓܵܘ ܩܲܕܝܼܫܘܼܬܵܐ. ܘܒܐܲܢܸ̈ܐ ܦܝܼܫܠܵܗ̇ ܦܪܝܼܫܬܵܐ ܡܼܢ ܟܠܸܗ ܓܸܢܤܵܐ ܕܢܸܫܸ̈ܐ: ܡܼܢ ܚܵܘܵܐ ܘܗܲܠ ܗ̇ܝ ܐ݇ܚܵܪܵܝܬܵܐ. ܒܸܐ݇ܡܵܪܵܐ ܝ݇ܠܸܗ ܟܬܵܒܼܵܐ ܩܲܕܝܼܫܵܐ (ܪܵܒܵܐ ܒܢܵܬܸ̈ـܐ ܥܒܸܕܠܗ݇ܘܼܢ ܟܫܝܼܛܘܼܬܵܐ: ܘܐܲܢ݇ܬ ܤܸܩܠܵܟܼܝ ܥܲܠ ܟܠܵܝ̈ܗܝ...ܡܲܬ̈ܠܸܐ 29:31) ܘܫܘܼܪܸܪܵܗ̇ ܠܐܵܗܵܐ ܗܲܡܙܲܡܬܵܐ ܐܸܠܝܼܫܒܲܥ ܐܝܼܡܵܢ ܕܐ݇ܡܸܪܵܗ̇ ܐܸܠܘܿܗ̇ (ܘܛܘܼܒܼܵܐ ܠܗ̇ܝ ܕܗܘܼܡܸܢܵܗ̇ ܕܗܵܘܸܐ ܬܝܵܡܵܐ ܠܐܵܢܝܼ̈ ܕܦܝܼܫܠܗ݇ܘܼܢ ܗܘܼܡܙܸܡܸ̈ܐ ܥܲܡܘܿܗ̇ ܡܼܢ ܠܟܸــــܤ ܡܵܪܝܵܐ...ܠܘܼܩܵܐ 45:1). ܘܗܘܼܡܸܢܵܗ̇ ܕܒܸܬ ܗܵܘܝܵܐ ܝܸܡܵܐ ܩܵܐ ܦܵܪܘܿܩܵܐ ܕܥܵܠܡܵܐ. ܐܝܼܢܵܐ ܡܼܢ ܩܲܕ݇ܡ ܕܐܵܗܵܐ ܒܸܐ݇ܡܵܪܵܐ ܝ݇ܠܵܗ̇ ܐܸܠܘܿܗ̇ ܐܸܠܝܼܫܒܲܥ (ܡܐܲܝܟܵܐ ܠܝܼ ܐܵܗܵܐ: ܕܝܸܡܸܗ ܕܡܵܪܝܼ ܐܵܬܝܵܐ ܠܟܸܤܠܝܼ..ܠܘܼܩܵܐ 43:1). ܘܟܲܕ ܡܲܪܝܲܡ ܒܬܼܘܼܠܬܵܐ ܝ݇ܠܵܗ̇ ܘܝܸܡܵܐ ܕܦܵܪܘܿܩܵܐ: ܬܸܪ̈ܘܵܝ ܐܲܢܸ̈ܐ ܢܘܼܩ̈ܙܸܐ ܐ݇ܤܝܼܪܵܐ ܝ݇ܢܵܐ ܒܦܘܼܪܩܵܢܵܐ. ܤܵܒܵܒ ܠܹܐ ܗܵܘܸܐ ܗ݇ܘ̣ܵܐ ܦܘܼܪܩܵܢܵܐ ܐܸܢ ܠܝܼܬ ܗ݇ܘ̣ܵܐ ܡܸܬܼܓܲܫܡܵܢܘܼܬܵܐ. ܝܵܥܢܝܼ: ܕܡܵܪܝܵܐ ܦܵܐܸܫ ܗ݇ܘ̣ܵܐ ܝ݇ܠܝܼܕܵܐ ܐܲܚܟ̰ܝܼ ܡܼܢ ܟܝܵܢܵܐ ܕܒܲܟܼܬܵܐ ܘܕܠܵܐ ܙܲܪܥܵܐ ܐ݇ܢܵܫܵܝܵܐ: ܩܲܕ ܡܵܨܸܐ ܗ݇ܘ̣ܵܐ ܕܗܵܘܸܐ ܗ݇ܘ̣ܵܐ ܡܼܢ ܓܹܝܢ݇ܒܲܢ. ܘܒܘܼܬ ܕܐܵܗܵܐ: ܡܵܪܲܢ ܪܵܒܵܐ ܓܵܗܸ̈ܐ ܟܸܐ ܡܲܦܠܸܚ ܗ݇ܘ̣ܵܐ ܚܲܒܪܵܐ (ܕܒܪܘܿܢܵܐ ܕܐ݇ܢܵܫܵܐ) ܤܵܒܵܒ ܒܐܵܗܵܐ ܟܘܼܢܵܝܵܐ ܦܘܼܪܸܩܠܸܗ ܠܒܲܪܢܵܫܵܐ. ܠܵܐ ܗܘܸܐܠܸܗ ܒܪܘܿܢܵܐ ܩܵܐ ܐܘܼܦ ܚܲܕ݇ ܒܲܪܢܵܫܵܐ، ܐܸܠܵܐ ܒܪܘܿܢܘܿܬܸܗ ܩܵܐ ܡܲܪܝܲܡ ܝܼܗ݇ܘ̣ܵܐ. ܘܒܘܼܬ ܕܐܵܗܵܐ: ܟܘܼܢܵܝܵܐ (ܕܝܸܡܵܐ ܕܡܵܪܲܢ) ܐ݇ܤܝܼܪܵܐ ܝ݇ܠܸܗ ܒܕܒܼܵܚܬܵܐ ܘܦܘܼܪܩܵܢܵܐ. ܐܵܪܵܐ: ܒܬܼܘܼܠܘܼܬܵـܐ ܕܡܲܪܝܲܡ ܐܝܼܬܠܵܗ̇ ܝܸܤܘܼܪܵܐ ܒܦܘܼܪܩܵܢܵܐ؟ ܕܠܵܐ ܫܸܟ ܐܝܼܬܠܵܗ̇ ܝܸܤܘܼܪܵܐ ܒܦܘܼܪܩܵܢܵܐ: ܤܵܒܵܒ ܡܫܝܼܚܵܐ (ܦܵܪܘܿܩܵܐ) ܠܹܐ ܗܵܘܝܵܐ ܗ݇ܘ̣ܵܐ ܕܦܵܐܸܫ ܗ݇ܘ̣ܵܐ ܝ݇ܠܝܼܕܵܐ ܒܙܲܪܥܵܐ ܐ݇ܢܵܫܵܝܵܐ ܡܼܢ ܓܲܒܼܪܵܐ ܘܒܲܟܼܬܵܐ ܘܗܵܘܸܐ ܗ݇ܘ̣ܵܐ ܒܲܪܢܵܫܵܐ ܥܝܵܕܵܝܵܐ. ܓܵܪܲܓ ܦܵܐܸܫ ܗ݇ܘ̣ܵܐ ܝ݇ܠܝܼܕܵܐ ܡܼܢ ܒܬܼܘܼܠܬܵـܐ: ܒܐܘܼܪܚܵܐ ܠܵܐ ܟܝܵܢܵܝܬܵܐ: ܒܪܘܼܚܵܐ ܕܩܘܼܕܫܵܐ: ܤܵܒܵܒ ܐܝܼܬܠܸܗ ܚܲܕ݇ ܒܵܒܵܐ (ܐܲܠܵܗܵܐ). ܘܩܲܕ ܠܵܐ ܦܵܐܸܫ ܝ݇ܠܝܼܕܵܐ ܒܚܛܝܼܬܵܐ ܟܝܵܢܵܝܬܵܐ ܘܐܲܨܠܵܝܬܵܐ: ܘܩܲܕ ܡܵܨܸܗ ܠܦܵܪܘܼܩܸܗ ܠܚܲܛܵܝܸ̈ܐ.
ܒܲܤ ܩܵܡܘܼܕܝܼ ܠܵܐ ܝܵܗ݇ܒܼܵܚ ܛܘܼܒܼܵܐ ܩܵܐ ܡܵܪܬܝ ܡܲܪܝܲܡ ܒܬܼܘܼܠܬܵܐ؟ ܘܡܘܼܕܝ݇ ܝܘܼܬܪܵܢܵܐ ܒܸܬ ܩܵܢܸܐ ܒܲܪܢܵܫܵܐ ܐܸܢ ܠܵܐ ܡܝܵܩܸܪ ܘܝܵܗ݇ܒܸܠ ܛܘܼܒܼܵܐ ܩܵܐ ܡܲܪܝܲܡ ܒܬܼܘܼܠܬܵܐ؟. ܘܟܲܕ ܫܠܝܼܚܵܐ ܡܝܵܩܘܼܪܵܐ ܝ݇ܠܸܗ ܠܒܬܼܘܼܠܘܼܬܼܵـܐ ܘܒܸܐ݇ܡܵܪܵܐ (ܐܝܼܢܵܐ ܒܸܐ݇ܡܵܪܵܐ ܝ݇ܘܸܢ ܠܐܵܢܝܼ̈ ܕܠܝܼܬܠܘܼܢ ܒܲܟܼܬܵܬܸ̈ـܐ: ܘܠܐܲܪ̈ܡܸܠܝܵܬܸـܐ: ܕܨܦܵܝܝܼ ܝܼܠܵܐ ܐܸܠܵܝ̈ܗܝ ܐܸܢ ܦܵܝܫܝܼ ܐܲܝܟܼ ܕܝܝܼ...1ܩܘܿܪ̈ܲܢܬܵܝܸܐ 8:7). ܘܐܝܼܡܵܢ ܕܡܲܪܝܲܡ ܐ݇ܡܸܪܵܗ̇ (ܗܵܐ ܡܼܢ ܐܵܕܝܼܵܐ ܛܘܼܒܼܵܐ ܒܸܬ ܝܵܗ݇ܒܼܝܼܠܝܼ ܟܠܵܝ̈ ܐܘܼܓ̰ܵܓܼܸ̈ܐ) ܠܹܐ ܗ݇ܘ̣ܵܐ ܡܲܥܢܵܝܘܿܗ̇ ܒܘܼܬ(ܗܲܝܡܵܢܘܼܬܘܿܗ̇) ܤܵܒܵܒ ܐ݇ܡܸܪܵܗ̇ (ܤܵܒܵܒ ܕܚܸܪܸܗ ܒܡܲܟܝܼܟܼܘܼܬܵܐ ܕܚܸܕܲܡܬܸܗ: ܤܵܒܵܒ ܗܵܐ ܡܼܢ ܐܵܕܝܼܵܐ ܛܘܼܒܼܵܐ ܒܸܬ ܝܵܗ݇ܒܼܝܼܠܝܼ ܟܠܵܝ̈ ܐܘܼܓ̰ܵܓܼܸ̈ܐ. ܤܵܒܵܒ ܕܥܒܸܕܠܸܐ ܠܟܸܤܠܝܼ ܫܘܼܠܸ̈ܐ ܓܘܼܪܸ̈ܐ ܗ̇ܘ ܕܝܼܠܸܐ ܚܲܝܠܵܢܵܐ: ܘܩܲܕܝܼܫܵܐ ܝ݇ܠܸܐ ܫܸܡܸܗ...ܠܘܼܩܵܐ 48:1-49) ܘܫܘܼܠܵܓܼ݇ܢܸ̈ܐ ܓܘܼܪܸ̈ܐ ܘܚܲܝܠܵܢܸ̈ܐ ܐܝܼܗ݇ܘ̤ܵܘ (ܡܗܘܼܨܸܠܵܗ̇ ܘܗ̇ܝ ܒܬܼܘܼܠܬܵــــــܐ) ܡܗܘܼܨܸܠܵܗ̇ ܠܡܵܪܝܵܐ. ܡܘܼܕܝܼ ܐܝܼܬ ܒܘܼܫ ܓܘܼܪܵܐ ܘܡܥܲܓ̰ܒܵܢܵܐ ܡܼܢ ܕܐܵܗܵܐ!!!؟. ܟܠ ܒܲܟܼܬܵܐ ܐܝܼܬܠܵܗ̇ ܗܲܝܡܵܢܘܼܬܵܐ: ܐܝܼܢܵܐ ܠܹܐ ܡܲܨܝܵܗ̇ ܟܠ ܒܲܟܼܬܵܐ ܕܡܗܲܨܠܵܗ̇ ܓܵܘ ܒܬܼܘܼܠܘܼܬܼܵـܐ!! ܘܒܘܼܬ ܕܐܵܗܵܐ ܡܵܪܲܢ ܥܲܠ ܙܩܝܼܦܵܐ، ܛܠܸܒܠܸܗ ܡܼܢ ܝܘܼܚܲܢܵܢ ܚܲܒܝܼܒܼܵܐ ܕܬܲܓܒܸܪܵܗ̇ ܝܸܡܸܗ. ܡܫܝܼܚܵܐ ܡܝܘܼܩܸܪܸܗ ܠܒܬܼܘܼܠܬܵܐ ܝܸܡܸܗ ܘܡܝܘܼܩܪܵܐܠܸܗ ܐܲܝܟܼ ܒܲܪܢܵܫܵܐ ܪܘܼܚܵܢܵܝܵܐ: ܘܗ̇ܘ ܒܓܵܢܸܗ ܡܓܘܼܒܸܐ ܠܸܗ ܗ̇ܝ ܒܘܼܫ ܡܩܘܼܕܸܫܬܵܐ ܩܲܕ ܗܵܘܝܵܐ ܝܸܡܵܐ ܩܵܬܸܗ܀܀
ܩܵܡܘܼܕܝܼ ܟܸܐ ܡܝܵܩܪܵܚ ܠܦܲܓܼܪܵܐ ܕܒܬܼܘܼܠܬܵܐ؟
ܦܲܓܼܪܵܐ ܩܲܕܝܼܫܵܐ ܕܒܬܼܘܼܠܬܵܐ ܦܪܝܼܫܵܐ ܝ݇ܠܸܗ ܒܐܝܼܩܵܪܵܐ ܡܼܢ ܦܲܓܼܪܸ̈ܐ ܐ݇ܚܸܪ̈݇ܢܸܐ ܕܒܢܲܝ̈ـܢܵܫܵܐ. ܤܵܒܵܒ ܦܲܓܼܪܵܐ ܝ݇ܠܸܗ ܕܓܵܘܸܗ ܫܪܸܐܠܸܗ (ܐܲܠܵܗܵܐ ܡܸܠܬܼܵـܐ) ܒܵܪܘܿܝܵܐ ܕܒܪܝܼܬܵܐ ܬܸܫܥܵܐ ܝܵܪ̈ܚܸܐ، ܘܩܲܕ݇ܡ ܩܵܕܸܫܠܸܗ ܪܘܼܚܵܐ ܕܩܘܼܕܫܵܐ. ܒܲܤ: ܚܫܝܼܚܬܵܐ ܕܐܵܗܵܐ ܦܲܓܼܪܵܐ ܩܲܕܝܼܫܵܐ ܫܵܒܸܩܠܸܗ ܡܵܪܝܵܐ ܕܐܵܙܸܠ ܠܚܪܵܒܼܵܐ؟ ܟܲܕ ܐܵܗܵܐ ܦܲܓܼܪܵܐ ܐܝܼܗ݇ܘ̣ܵܐ ܗ̇ܘ ܒܘܼܫ ܕܸܟܼܝܵܐ. ܟܸܐ ܗܵܘܝܵܐ ܕܠܵܐ ܩܵܒܸܠ ܐܝܼܩܵܪܵܐ ܡܼܢ ܡܵܪܝܵܐ؟. ܘܐܵܢܝܼ̈ ܕܠܵܐ ܡܝܵܩܪܝܼ ܠܒܬܼܘܼܠܬܵܐ: ܠܹܐ ܡܝܵܩܪܝܼ ܐܘܼܦ ܠܩܲܕܝܼܫܸ̈ܐ، ܘܟܸܐ ܤܲܪܒܼܝܼ ܠܗܲܡܙܲܡܬܵܐ ܕܡܵܪܲܢ ܕܒܸܐ݇ܡܵܪܵܐ ܝ݇ܠܸܗ (ܡܿܢ ܕܡܝܵܩܸܪܘܿܟܼܘܿܢ، ܡܝܵܩܘܼܪܸܐܠܸܗ ܐܸܠܝܼ). ܡܵܪܝܵܐ ܡܝܘܼܩܸܪܸܗ ܠܦܲܓܼܪܵܐ ܕܡܲܪܝܲܡ، ܘܒܸܬ ܡܝܵܩܸܪܸܗ ܐܘܼܦ ܓܵܘ ܩܝܵܡܬܵܐ. ܡܝܘܼܩܸܪܸܗ ܠܦܲܓܼܪܵܐ ܕܡܘܼܫܸܐ ܡܼܢ ܩܲܕ݇ܡ ܩܝܵܡܬܵܐ ܘܩܲܕ݇ܡ ܓܵܠܸܐܠܸܗ ܥܲܠ ܛܘܼܪܵܐ ܕܬܵܒܼܘܼܪ ܒܝܵܘܡܵܐ ܕܓܸܠܝܵܢܵܐ. ܐܵܢܝܼ̈ ܕܗܲܡܙܸܡܝܼ ܕܲܪܩܘܼܒܼܠ ܕܒܬܼܘܼܠܬܵܐ ܠܸܐ ܩܵܢܝܼ ܡܸܢܕܝܼ ܐܸܠܵܐ ܒܸܬ ܚܵܤܪܝܼ ܠܪܵܒܵܐ܀܀܀
ܡܫܡܫܢܐ:ܝܘܤܦ ܢܘܼܪܘܼ