ܒܝܕ ܡܫܡܫܢܐ: ܝܘܤܦ ܢܘܼܪܘܼ
ܡܼܢ ܩܲܕ݇ܡ ܕܥܲܒܼܪܵܚ ܓܵܘ ܢܘܼܗܵܪܵܐ ܓܕܝܼܡܵܐ ܕܨܵܘܡܵܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵـܐ..... ܘܵܐܠܸܐ ܕܩܲܕ݇ܡܵܝܬܵܐ ܝܵܕܥܵܚ ܠܥܸܩܪܵܐ ܘܫܸܪܫܵܐ ܕܛܡܝܼܪܵܐ ܝ݇ܠܸܗ ܓܵܘ ܐܲܪܥܵܐ ܕܕܝܵܬܸܩܸ̈ܐ ܥܲܬܝܼܩܸ̈ܐ، ܩܲܕ ܡܵܛܵܚ ܠܛܥܘܼܢܬܵܐ ܕܐܵܗܵܐ ܨܵܘܡܵܐ ܕܡܘܼܓ̰ܝܸܢܸܗ ܓܵܘ ܚܲܕܬܵــــــܐ (ܙܲܒܼܢܵܐ ܕܫܵܦܵܩܲܬ). ܤܵܒܵܒ ܫܠܝܼܚܵܐ ܒܸܐ݇ܡܵܪܵܐ ܝ݇ܠܸܗ (ܐܲܢܸ̈ܐ ܕܝܼܢܵܐ ܛܸܠܵܢܝܼܵܬܸ̈ـܐ ܕܐܵܢܝܼ̈ ܕܐܝܼܢܵܐ ܗܕܝܼܪܸ̈ܐ ܠܸܗܘܵܝܵܐ...ܩܘܿܠܸܤܵܝܸ̈ܐ17:2). ܡܘܼܕܝܼ ܝ݇ܢܵܐ ܛܸܠܵܢܝܼܵܬܸ̈ـܐ ܕܐܝܼܢܵܐ ܗܕܝܼܪܸ̈ܐ ܠܸܗܘܵܝܵܐ؟ ܡܼܢ ܫܘܼܪܵܝܵܐ ܕܤܸܦܪܵܐ ܩܲܕ݇ܡܵܝܵܐ ܕܒܪܝܼܬܵܐ: ܓܵܘܸܗ ܛܫܝܼܬܵܐ ܗ݇ܘ̣ܵܐ ܐܵܗܵܐ ܛܸܠܵܢܝܼܬܵܐ ܕܒܸܪܡܵܙܵܐ ܗ݇ܘ̣ܵܐ ܠܡܫܝܼܚܵܐ. ܐܝܼܡܵܢ ܕܛܘܼܪܸܨܠܸܗ ܐܲܠܵܗܵܐ ܟܵܤܵܝܬܵܐ ܕܡܼܢ ܓܸܠܕܵܐ (ܕܗܲܝܘܵܢ) ܩܵܐ ܡܟܵܤܵܝܬܵܐ ܕܐܵܕܵܡ ܘܚܵܘܵܐ. ܤܵܒܵܒ ܛܲܪ̈ܦܸܐ ܕܬܸܐܢܵܐ ܠܸܐ ܡܵܨܝܼ ܗ݇ܘ̤ܵܘ ܠܟܵܤܘܼܝܸܗ ܫܘܼܠܚܵܝܘܼܬܵܝܗܝ ܕܩܘܼܒܠܵܐ ܠܗ݇ܘܼܢ ܒܥܸܠܬܵܐ ܕܚܛܝܼܬܵܐ. ܗܲܕܟܼܵܐ: ܐ݇ܬܸܐܠܗ݇ܘܼܢ ܓܲܒܼܪܸ̈ܐ ܕܐܲܠܵܗܵܐ ܐܲܒܼܪܵܗܵܡ ܘܐܝܼܤܚܵܩ ܘܝܵܥܩܘܼܒܼ ܘܟܠܵܝ̈ܗܝ ܢܒܼܝܸ̈ܐ ܠܟܵܤܘܼܝܸܐ ܚܛܝܼܬܵܐ ܕܒܲܪܢܵܫܵܐ: ܐܝܼܢܵܐ ܠܵܐ ܡܨܸܐܠܗ݇ܘܼܢ ܤܵܒܵܒ ܐܵܢܝܼ̈ ܤܢܝܼܩܵܐ ܗ݇ܘ̤ܵܘ ܩܲܕ݇ܡܵܝܬܵܐ ܠܟܵܤܘܼܝܸܗ ܒܲܨܘܼܪܘܼܝܵܬܵܝܗܝ. ܘܟܠܸܗ ܦܸܠܚܵܢܵܝܗܝ ܛܫܝܼܬܵܐ ܗ݇ܘ̣ܵܐ ܓܵܘܸܗ ܛܸܠܵܢܝܼܬܵܐ ܕܒܸܪܡܵܙܵܐ ܗ݇ܘ̣ܵܐ ܠܡܵܪܲܢ، ܕܵܐܟܼܝܼ ܕܐ݇ܡܸܪܸܗ ܫܠܝܼܚܵܐ (ܐܵܢܝܼ̈ ܕܥܲܒܼܕܝܼ ܚܸܠܡܲܬ ܠܕܘܼܡܝܵܐ ܘܠܛܸܠܵܢܝܼܬܵܐ ܕܐܝܼܬ ܒܫܡܲܝܵܐ...ܥܸܒܼܪ̈ܵܝܸܐ 5:8). ܩܵܐ ܛܘܼܦ̮ܤܵܐ: ܨܵܘܡܵܐ ܕܐܲܪܒܥܝܼ: ܕܡܘܼܫܸܐ ܘܐܸܠܝܼܵܐ ܘܫܲܪܟܵܐ ܕܢܒܼܝܸ̈ܐ...ܒܸܪܡܵܙܵܐ ܗ݇ܘ̤ܵܘ ܠܨܵܘܡܵܐ ܕܡܵܪܲܢ. ܘܫܲܒܼܥܵܐ ܥܹܐܕܵܘܵܬܸ̈ـܐ ܕܝܗ݇ܘܼܕܵܝܸ̈ܐ ܕܦܝܵܫܵܐ ܝ݇ܢܵܐ ܡܘܼܕܟܼܪܸ̈ܐ ܓܵܘ (ܤܸܦܪܵܐ ܕܟܵܗܢܸ̈ܐ 23) ܦܝܼܫܠܗ݇ܘܼܢ ܡܬܘܼܡܸܡܸܐ ܒܡܵܪܲܢ. (ܥܹܐܕܵܐ ܕܦܸܨܚܵܐ، ܕܦܲܛܝܼܪܸ̈ܐ، ܒܘܼܟܼܪܘܼܬܵܐ، ܕܚܲܡܫܝܼ، ܡܲܩܘܵܚܬܵܐ (ܡܚܵܝܬܵܐ ܕܫܝܼܦܘܼܪܵܐ)، ܕܚܘܼܤܵܝܵܐ، ܕܡܛܲܠܠܸ̈ܐ). ܦܝܼܫܠܗ݇ܘܼܢ ܡܬܘܼܡܸܡܸܐ ܒܡܵܪܲܢ... 1 ܦܸܨܚܵܐ ܕܕܝܼܵܢ ܡܫܝܼܚܵܐ ܝ݇ܠܸܗ (1ܩܘܿܪ̈ܲܢܬܵܝܸܐ 7:5). 2 ܥܹܐܕܵܐ ܒܦܲܛܝܼܪܵܐ ܕܕܘܼܙܘܼܬܵܐ ܘܨܸܦܝܘܼܬܵܐ (1ܩܘܿܪ̈ܲܢܬܵܝܸܐ 8:5). 3 ܡܫܝܼܚܵܐ ܗܘܸܐܠܸܗ ܪܸܫܝܼܬܵܐ (1ܩܘܿܪ̈ܲܢܬܵܝܸܐ 23:15). 4 ܡܫܵܕܲܪܬܵܐ ܕܪܘܼܚܵܐ (ܦܪܲܟܤܝܼܤ 4:2).
5 ܘܫܵܕܸܪ ܡܲܠܲܐܟܼܘܼܗܝ ܥܲܡ ܩܵܠܵܐ ܕܫܝܼܦܘܼܪܵܐ (ܡܲܬܲܝ 31:24). 6 ܒܸܬ ܐܵܬܸܐ ܦܵܪܘܼܩܵܐ ܡܼܢ ܨܸܗܝܘܼܢ ܘܡܲܕܸܪ ܥܵܘܠܵܐ ܕܝܵܥܩܘܼܒܼ (ܪ̈ܗ݇ܘܿܡܵܝܸܐ 26:11). 7 ܢܝܵܚܵܐ ܘܒܘܼܤܵܡܵܐ ܒܸܬ ܗܵܘܸܐ ܒܡܵܪܲܢ (ܙܟܲܪܝܵܐ 16:14-18).
ܨܵܘܡܵܐ ܕܬܪ̈ܵܝ ܝܵܘܡܵܢܸ̈ܐ ܕܓܵܘ ܫܲܒܬܵܐ (ܠܘܼܩܵܐ 9:18-14) ܐܲܢܸ̈ܐ ܬܪ̈ܵܝ ܝܵܘܡܵܢܸ̈ܐ (ܬܪܝܼܢܒܫܲܒܵܐ ܘܚܲܡܫܲܒܫܲܒܵܐ) ܗܲܠ ܐܸܕܝܘܼܡ ܝܗ݇ܘܼܕܵܝܸ̈ܐ ܟܸܐ ܨܲܝܡܝܼ ܠܗ݇ܘܼܢ ܒܗ̇ܝ ܕܡܘܼܫܸܐ ܐ݇ܤܸܩܠܸܗ ܠܛܘܼܪܵܐ ܒܝܵܘܡܵܐ ܕܬܪܝܼܢܒܫܲܒܵܐ ܠܩܵܒܘܼܠܸܐ ܩܵܢܘܼܢܸ̈ܐ ܡܼܢ ܐܲܠܵܗܵܐ، ܘܨܠܹܐܠܸܗ ܒܝܵܘܡܵܐ ܕܚܲܡܫܲܒܫܲܒܵܐ. ܐܲܢܸ̈ܐ ܬܪ̈ܵܝ ܝܵܘܡܵܢܸ̈ܐ ܛܸܠܵܢܝܼܬܵܐ ܗ݇ܘ̤ܵܘ ܠܝܵܘܡܵܢܸܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵܐ. ܕܵܐܟܼܝܼ ܕܡܘܼܫܸܐ ܩܘܼܒܸܠܸܗ ܓ̰ܘܼܢܓ̰ܵܪܵܐ ܡܼܢ ܛܵܝܸܦܵܐ ܩܸܫܝܵܐ ܕܩܕܵܠܵܐ ܘܒܘܼܬ ܚܵܬܸܪܵܝܗܝ ܐ݇ܤܸܩܠܸܗ ܠܛܘܼܪܵܐ ܒܝܵܘܡܵܐ ܕܬܪܝܼܢܒܫܲܒܵܐ، ܗܲܕܟܼܵܐ ܒܢܘܼܢܸ̈ܐ ܕܐܵܢܝܼ̈ ܥܒܼܸܕܠܗ݇ܘܼܢ ܪܵܐܝ ܠܕܒܼܵܩܵܐ ܠܡܵܪܵܐ ܕܡܘܼܫܸܐ. ܘܐܝܼܡܵܢ ܕܨܠܸܐܠܸܗ ܡܪܸܫ ܛܘܼܪܵܐ ܒܝܵܘܡܵܐ ܕܚܲܡܫܲܒܫܲܒܵܐ ܘܚܙܸܐܠܸܗ ܠܒܝܼܫܘܼܬܵܐ ܕܛܵܝܸܦܵܐ ܒܡܛܵܪܲܨܬܵܐ ܕܡܘܼܓ̰ܵܐ ܘܠܤܓܼܵܕܵܐ ܥܲܠܸܗ، ܫܡܸܛܠܸܗ ܠܐܵܢܝܼ̈ ܠܘܼܚܸ̈ܐ ܕܒܸܪܡܵܙܵܐ ܗ݇ܘ̣ܵܐ ܠܫܡܲܛܬܵܐ (ܡܵܘܬܵܐ) ܕܦܲܓܼܪܵܐ ܕܐ݇ܢܵܫܘܼܬܵܐ ܕܡܵܪܲܢ ܒܝܵܘܡܵܐ ܕܥܪܘܼܒܼܬܵܐ!!!. ܒܲܤ ܐܸܢ ܝܗ݇ܘܼܕܵܝܸ̈ܐ ܗܲܠ ܝܵܘܡܵܢܵܐ ܟܸܐ ܨܵܝܡܝܼ ܠܐܲܢܸ̈ܐ ܬܪ̈ܵܝ ܝܵܘܡܵܢܸܐ، ܟܡܵܐ ܘܵܐܠܸܐ ܕܐܲܚܢܵܢ ܨܲܝܡܵܚ ܒܐܲܪܒܥܲܒܫܲܒܵܐ ܘܥܪܘܼܒܼܬܵܐ ܒܘܼܬ ܚܵܬܸܪ ܕܗ̇ܘ ܕܩܲܕ݇ܡ ܦܵܪܸܩܠܲܢ ܓܵܘ ܕܐܲܢܸ̈ܐ ܬܪ̈ܝ ܝܵܘܡܵܢܸ̈ܐ!!!. ܡܘܼܡܟܸܢ ܚܲܕ݇ ܒܸܬ ܐܵܡܸܪ: ܠܹܐ ܝ݇ܠܵܐ ܦܝܵܫܵܐ ܡܘܼܕܟܸܪܬܵܐ ܓܵܘ ܟܬܵܒܼܵܐ ܩܲܕܝܼܫܵܐ.. ܪܵܒܵܐ ܡܸܢܕܝܼܵܢܸ̈ܐ ܠܹܐ ܝ݇ܢܵܐ ܦܝܼܫܸ̈ܐ ܟܬܝܼܒܸ̈ܐ ܒܕܸܩܲܬ ܓܵܘ ܟܬܵܒܼܵܐ ܩܲܕܝܼܫܵܐ ܐܸܠܵܐ ܛܸܠܵܢܝܼܵܬܵـܐ ܝ݇ܢܵܐ ܘܦܝܼܫܠܗ݇ܘܼܢ ܓܸܠܝܸ̈ܐ ܒܐܲܒܼܵܗܵܬܼܵـܐ ܢܦܝܼܚܸ̈ܐ ܒܪܘܼܚܵܐ ܕܩܘܼܕܫܵܐ. ܕܵܐܟܼܝܼ ܕܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ ܓܵܘ ܐܸܓܲܪܬܸܗ ܩܵܐ ܛܝܼܡܵܬܸܐܘܼܤ (ܐܵܢܝܼ̈ ܕܫܡܸܥܠܘܼܟܼ ܡܸܢܝܼ ܒܝܲܕ ܪܵܒܵܐ ܤܵܗܵܕܸ̈ܐ: ܐܲܢܸ̈ܐ ܤܵܦܝܼ ܠܐ݇ܢܵܫܸ̈ܐ ܡܗܘܼܝܡܢܸ̈ܐ...2ܛܝܼܡܵܬܸܐܘܼܤ 2:2). (ܐܝܼܢܵܐ ܐܝܼܬ ܐܘܼܦ ܪܵܒܵܐ ܡܸܢܕܝܼܵܢܸ̈ܐ ܐ݇ܚܸܪ̈݇ܢܸܐ ܕܥܒܼܸܕܠܸܐ ܝܼܫܘܿܥ ܐܵܢܝܼ̈ ܕܐܸܢ ܚܕܵܐ ܚܕܵܐ ܦܵܝܫܝܼ ܗ݇ܘ̤ܵܘ ܟܬܝܼܒܸ̈ܐ ܐܘܼܦ ܠܵܐ ܐܵܗܵـــــܐ ܥܵܠܡܵܐ ܐܲܝــــــܟܼ ܕܒܸܚܫܵܒܼܵܐ ܝ݇ܘܸܢ ܒܸܬ ܡܵܠܸܐ ܗ݇ܘ̣ܵـــــــܐ ܠܟܬܵܒܸ̈ܐ ܕܦܵܝܫܝܼ ܗ݇ܘ̤ܵܘ ܟܬܝܼܒܸ̈ܐ..ܝܘܼܚܲܢܵܢ 25:21). (ܡܲܠܦܘܼܢ ܠܗ݇ܘܼܢ ܕܢܵܛܪܝܼ ܟܠ ܡܸܢܕܝܼ ܕܦܩܝܼܕܵܐ ܝ݇ܘܸܢ ܐܸܠܘܿܟܼܘܿܢ...ܡܲܬܲܝ20:28). (ܒܲܤ ܐܵܕܝܼܵܐ ܐܵܚܘܼܢܘܵܬܝܼ...ܟܠܹܐܡܘܼܢ ܘܚܡܘܼܠܘܼܢ ܒܤܲܦܝܵܢܘܼܝܵܬܸ̈ـܐ ܕܝ݇ܠܸܦܠܘܿܟܼܘܿܢ: ܐܸܢ ܒܝܲܕ ܗܸܡܸܙܡܲܢ: ܘܐܸܢ ܒܝܲܕ ܐܸܓܲܪܬܵܐ ܕܕܝܼܵܢ....2ܬܸܤܵܠܘܿܢܝܼܩܵܝܸ̈ܐ 15:2).
(ܐܝܼܢܵܐ ܥܲܠ ܡܸܢܕܝܼܵܢܸ̈ܐ ܐ݇ܚܸܪ̈݇ܢܸܐ ܐܝܼܡܵܢ ܕܐܵܬܸܢ ܒܸܬ ܦܲܩܕܸܢܘܿܟܼܘܿܢ...1ܩܘܿܪ̈ܲܢܬܵܝܸܐ 34:11). ܘܒܚܲܪܬܵـــــܐ ܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ (ܤܵܒܵܒ ܢܵܡܘܼܤܵܐ ܛܸܠܵܢܝܼܬܵـــــــܐ ܐܝܼܬܗ݇ܘ̣ܵܐ ܒܝܼܸܗ ܕܛܵܒܼܵܬܸ̈ـܐ ܕܝܼܢܵܐ ܗܕܝܼܪܸ̈ܐ ܕܗܵܘܝܼ...ܥܸܒܼܪ̈ܵܝܸܐ 1:10). ܘܚܲܕ݇ ܡܼܢ ܕܐܵܢܝܼ̈ ܛܵܒܼܵܬܸ̈ـܐ ܐܝܼܠܵܗ̇: ܕܫܲܘܬܘܼܦܵܐ ܝ݇ܘܵܚ ܓܵܘ ܚܲܫܵܐ ܕܡܵܪܲܢ ܒܨܵܘܡܵܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵܐ: ܘܕܵܐܟܼܝܼ ܕܗ̇ܘ ܨܝܼܡܵܐ ܗ݇ܘ̣ܵܐ ܘܨܗܹܐܠܸܗ ܠܡܝܼܵܐ ܘܦܝܼܫܠܸܗ ܝܘܼܗ݇ܒܼܵܐ ܐܸܠܸܗ ܚܵܠܵܐ ܡܙܝܼܓܼܵܐ ܒܡܪܲܪܬܵܐ: ܗܲܕܟܼܵܐ ܐܘܼܦ ܐܲܚܢܵܢ ܒܸܨܝܵܡܵܐ ܝ݇ܘܵܚ!!!. ܓܵܘ ܟܬܵܒܼܵܐ (ܕܕܝܼܵܤܩܵܠܝܼܘܼܢ: ܡܲܠܦܵܢܘܼܬܵܐ ܕܫܠܝܼܚܸ̈ܐ) ܪܸܫܵܐ ܕ(4) ܦܝܵܫܵܐ ܝ݇ܠܵܗ̇ ܐ݇ܡܝܼܪܬܵܐ: (ܐܝܼܡܵܢ ܕܩܸܡܠܸܗ ܡܵܪܲܢ ܝܼܫܘܿܥ ܡܫܝܼܚܵܐ ܡܼܢ ܓܵܘܵܐ ܕܡܝܼܬܸ̈ـܐ، ܩܲܕ݇ܡ ܦܵܩܸܕܠܲܢ ܕܨܲܝܡܵܚ ܝܵܘܡܵܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵܐ). ܒܝܵܘܡܵܐ ܕܐܲܪܒܥܲܒܫܲܒܵܐ: ܐ݇ܬܹܐܠܘܼܢ ܟܵܗܢܸ̈ܐ ܕܝܗ݇ܘܼܕܵܝܸ̈ܐ ܠܟܸܤ ܝܼܗܘܼܕܵܐ ܚܲܕ݇ ܡܼܢ ܬܪܸܥܤܲܪ ܬܲܠܡܝܼܕܸ̈ܐ: ܘܒܘܼܩܸܪܘܼܢ ܒܘܼܬ ܕܘܼܟܵܐ ܕܡܫܝܼܚܵܐ، ܘܩܘܼܘܸܠܘܼܢ ܕܒܸܬ ܝܲܗ݇ܒܼܝܼܠܸܗ (30) ܙܘܼܙܸ̈ܐ ܕܤܸܐܡܵܐ: ܘܗ̇ܘ ܩܘܼܘܸܠܸܗ ܕܒܸܬ ܤܵܦܝܼܠܸܗ ܒܐܝܼܕܵܬܵܝ̈ܗܝ. ܒܐܵܗܵܐ ܝܵܘܡܵܐ ܬܲܠܡܝܼܕܸ̈ܐ ܦܫܸܡܠܘܼܢ، ܘܟܵܗܢܸ̈ܐ ܘܤܵܦܪܸ̈ܐ ܘܦܪ̈ܝܼܫܸܐ ܚܕܸܐܠܘܼܢ، ܘܤܵܛܵܢܵܐ ܦܨܸܚܠܸܗ ܒܪܵܐܝ ܕܩܸܛܠܸܗ. ܘܒܘܼܬ ܕܐܵܗܵܐ ܫܠܝܼܚܸ̈ܐ ܦܩܸܕܠܘܼܢ ܒܚܲܝܠܵܐ ܕܪܘܼܚܵܐ ܕܨܲܝܡܵܚ ܟܠ ܝܵܘܡܵܐ ܕܐܲܪܒܥܲܒܫܲܒܵܐ ܩܲܕ ܡܫܲܘܬܸܦܵܚ ܥܲܡܵܝܗܝ ܓܵܘ ܚܲܫܵܐ. ܘܟܠ ܕܠܵܐ ܨܵܐܸܡ ܡܫܲܘܬܘܼܦܵܐ ܝ݇ܠܸܗ ܥܲܡ ܝܼܗܘܼܕܵܐ ܘܤܵܛܵܢܵܐ ܘܟܵܗܢܸ̈ܐ ܕܝܗ݇ܘܼܕܵܝܸ̈ܐ ܓܵܘ ܩܸܛܠܵܐ ܕܡܵܪܲܢ. ܓܵܘ ܟܬܵܒܼܵܐ (ܕܡܲܪ̈ܓܲܢܝܵܬܸـܐ ܛܝܼܡܵܢܸ̈ܐ: ܠܝܘܼܚܲܢܵܢ ܒܲܪ ܙܟܲܪܝܵܐ)ܪܸܫܵܐ ܕ(7) ܦܵܬܵܐ 215-216 ܗܲܕܟܼܵܐ ܦܝܵܫܵܐ ܝ݇ܠܵܗ̇ ܐ݇ܡܝܼܪܬܵܐ (ܘܵܐܠܸܐ ܥܲܠ ܟܠܵܝ̈ܗܝ ܐܵܢܝܼ̈ ܕܟܸܐ ܡܗܲܝܡܸܢܝܼ ܒܗ̇ܘ ܕܦܝܼܫܠܸܗ ܡܸܚܝܵܐ ܥܲܠ ܙܩܝܼܦܵܐ: ܓܲܒܼܪܸ̈ܐ ܘܢܸܫܸ̈ܐ ܘܐܘܼܦ ܙܥܘܼܪܸ̈ܐ: ܕܨܲܝܡܝܼ ܝܵܘܡܵܢܸ̈ܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵܐ: ܩܲܕ ܡܵܨܝܼ ܕܚܲܕܟ̰ܵܐ ܦܲܪܥܝܼ ܡܼܢ ܕܵܝܢܵܐ ܕܓ̰ܘܼܢܓ̰ܵܪܸ̈ܐ ܕܩܘܼܒܠܵܝܠܸܗ ܡܵܪܲܢ ܒܘܼܬ ܚܵܬܸܪܵܝܗܝ ܒܝܵܘܡܵܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵܐ. ܘܡܿܢ ܕܠܵܐ ܨܵܐܸܡ ܡܲܤܠܘܼܝܵܐ ܝ݇ܠܸܗ ܠܦܵܪܘܼܩܵܐ ܘܠܓ̰ܘܼܢܓ̰ܵܪܸ̈ܐ ܕܩܘܼܒܠܵܝܠܸܗ، ܘܫܲܘܬܘܼܦܵܐ ܝ݇ܠܸܗ ܥܲܡ ܤܵܛܵܢܵܐ ܘܤܲܢܝܵܢܸ̈ܐ ܕܡܵܪܝܵܐ، ܘܤܵܗ݇ܡܸܗ ܒܸܬ ܗܵܘܸܐ ܥܲܡܵܝܗܝ. ܘܒܵܬܲܪ ܤܵܥܲܬ (9) ܒܪܲܡܫܵܐ ܡܵܨܝܼ ܨܲܝܡܵܢܸ̈ܐ ܕܫܵܪܝܼ ܠܨܵܘܡܵܝܗܝ: ܤܵܒܵܒ ܓܵܘ ܕܐܵܗܵܐ ܤܵܥܲܬ ܡܵܪܲܢ ܓܼܠܸܒܠܸܗ ܠܤܵܛܵܢܵܐ ܘܚܲܝܠܵܘܵܬܸ̈ܗ، ܘܚܕܸܐܠܗ݇ܘܼܢ ܐܵܕܵܡ ܘܒܢܘܼܢܸ̈ܗ). ܒܸܐ݇ܡܵܪܵܐ ܝ݇ܠܸܗ ܡܵܪܝ ܐܲܓܼܢܵܛܝܼܘܼܤ ܓܵܘ ܐܸܓܲܪܬܸܗ ܩܵܐ ܦܝܼܠܝܼܦܝܼܤܵܝܸ̈ܐ (ܠܵܐ ܡܲܚܦܝܼܠܝܼܬܘܼܢ ܡܼܢ ܨܵܘܡܵܐ ܪܲܒܵܐ ܤܵܒܵܒ ܓܵܘܸܗ ܚܒܼܝܼܫܵܐ ܝ݇ܢܵܐ ܐܘܼܪ̈ܚܵܬܸܐ ܡܗܲܕܝܵܢܸ̈ܐ ܕܡܵܪܝܵܐ. ܠܵܐ ܡܲܚܦܝܼܠܝܼܬܘܼܢ ܡܼܢ ܠܨܝܵܡܵܐ ܒܝܵܘܡܵܢܸ̈ܐ ܕܐܲܪܒܥܲܒܫܲܒܵܐ ܘܥܪܘܼܒܼܬܵܐ: ܘܗܲܒܼ݇ܠܘܼܢ ܡܼܢ ܙܵܘܕܘܼܢܝܘܿܟܼܘܿܢ ܩܵܐ ܤܢܝܼܩܸ̈ܐ ܘܡܘܼܠܝܸܨܸ̈ܐ).
ܓܵܘ ܟܬܵܒܼܵܐ ܕܡܲܪܓܵܢܝܼܬܵܐ ܥܲܠ ܫܪܵܪܵܐ ܕܟܪܸܤܛܝܵܢܘܼܬܵܐ: ܠܡܵܪܝ ܥܲܒܼܕܝܼܫܘܿܥ ܡܝܼܛܪܵܦܘܿܠܝܼܛܵܐ ܕܨܘܼܒܼܵܐ ܘܕܐܲܪܡܵܢܝܼܵܐ. ܓܵܘ ܦܵܬܵܐ (ܤܐ) ܗܲܕܟܼܵܐ ܝ݇ܠܸܗ ܒܸܐ݇ܡܵܪܵܐ ܥܲܠ ܝܵܘܡܵܐ ܕܥܪܘܼܒܼܬܵܐ... (ܝܵܘܡܵܐ ܫܬܝܼܬܵܝܵܐ ܟܸܐ ܦܵܐܸܫ ܗ݇ܘ̣ܵܐ ܩܸܪܝܵܐ ܐܵܗܵܐ ܝܵܘܡܵܐ: ܗܲܠ ܕܓܢܸܐܠܵܗ̇ ܒܝܼܸܗ ܫܸܡܫܵܐ ܒܙܩܝܼܦܘܼܬܸܗ ܕܦܵܪܘܼܩܲܢ ܘܡܗܘܼܟܸܡܠܸܗ ܚܸܫܟܵܐ ܥܲܠ ܟܠܵܝܗܝ ܒܸܪ̈ܝܵܬܸܐ: ܒܘܼܬ ܡܩܲܫܕܲܪܬܵܐ ܕܝܗ݇ܘܼܕܵܝܸ̈ܐ: ܒܘܼܬ ܕܐܵܗܵܐ ܦܝܼܫܠܸܗ ܩܸܪܝܵܐ ܥܪܘܼܒܼܬܵܐ: ܘܗܘܸܐ ܠܗ݇ܘܼܢ ܒܸܪ̈ܝܵܬܸܐ ܒܚܲܫܵܐ ܘܠܒܼܸܫܠܗ݇ܘܼܢ ܬܵܙܝܼ: ܥܲܠ ܓܘܼܪܘܼܬܵܐ ܕܚܛܝܼܬܵܐ ܩܲܕ݇ܡܵܝܬܵܐ ܘܕܓܵܘܵܐ: ܕܒܘܼܬ ܕܝܼܵܗ̇ ܡܝܼܬܠܸܗ ܗ̇ܘ ܕܠܵܐ ܥܒܼܝܼܕܠܸܗ ܥܵܘܠܵܐ: ܘܠܵܐ ܦܸܠܡܵܐ ܦܝܼܫܠܸܗ ܡܘܼܫ̄ܟ̰ܚܵܐ ܒܤܸܦܘܵܬܸ̈ܗ. ܫܡܲܝܵܐ ܒܚܸܫܟܸܗ ܕܫܸܡܫܵܐ: ܐܲܪܥܵܐ ܒܪܵܘܕܵܢܵܐ ܘܒܪܓܘܼܕܵܐ: ܗܲܝܟܠܵܐ ܒܤܸܬܪܵܐ ܕܒܝܼܸܗ ܦܝܼܫܠܸܗ ܡܟ̰ܘܼܢܟ̰ܸܪܵܐ: ܟܹܐܦܸ̈ـــــــܐ ܒܦܩܵܥܝܵܬܲܝ̈ܗܝ: ܗܲܠ ܕܗܲܝܘܵܢܸ̈ܐ ܐܲܟܼܠܵܢܸ̈ܐ ܕܒܸܤܪܵܐ ܘܛܲܝܪܸ̈ܐ ܠܵܐ ܛܥܝܼܡܠܗ݇ܘܼܢ ܒܸܤܪܵܐ ܘܠܵܐ ܡܩܘܼܪܒܸܢܗ݇ܘܼܢ ܠܫܠܲܕܸ̈ܐ: ܒܘܼܬ ܐܝܼܩܵܪܵܐ ܕܫܠܲܕܵܐ ܩܲܕܝܼܫܬܵܐ ܕܦܵܪܘܼܩܵܐ ܕܡܬܝܼܚܬܵܐ ܗ݇ܘ̣ܵܐ ܥܲܠ ܩܲܝܤܵܐ: ܐܲܝܟܼ ܕܝܼܠܸܐ ܪܫܝܼܡܵܐ ܒܢܘܼܗܵܪܵܐ ܕܡܵܪܝ ܐܲܦܪܹܝܡ. ܘܒܘܼܬ ܕܐܵܗܵܐ ܫܠܝܼܚܸ̈ܐ ܡܘܼܬܸܒܼܠܗ݇ܘܼܢ ܩܵܢܘܼܢܵܐ ܕܠܵܐ ܐܲܟܼܠܝܼ ܟܪܸ̈ܤܛܝܵܢܸܐ ܒܸܤܪܵܐ ܒܐܵܗܵܐ ܝܵܘܡܵܐ. ܐܘܼܦܠܵܐ ܒܐܲܪܒܲܥܒܼܫܸܒܵܐ ܗ̇ܘ ܕܒܝܼܸܗ ܝܗ݇ܘܼܕܵܝܸ̈ܐ ܥܒܼܝܼܕܠܗ݇ܘܼܢ ܪܵܐܝ ܥܲܠ ܩܸܛܠܸܗ ܕܦܵܪܘܼܩܲܢ: ܘܛܝܼܡܸ̈ܐ ܕܕܸܡܵܐ ܙܲܟܵܝܵܐ ܥܲܠ ܝܼܗܘܼܕܵܐ ܤܟܲܪܝܘܼܛܵܐ ܩܛܝܼܥܠܗ݇ܘܼܢ: ܒܘܼܬ ܕܐܵܗܵܐ ܗܲܓ̰ܲܬ ܗܲܪ ܒܗ̇ܘ ܩܵܢܘܼܢܵܐ ܡܘܼܕܟܼܸܪܗ݇ܘܼܢ. ܤܵܒܵܒ ܕܒܤܲܪܲܤܬܘܼܬܵܐ ܝܵܘܡܵܐ ܕܚܲܫܵܐ ܝ݇ܠܸܗ ܝܵܘܡܵܐ ܕܥܪܘܼܒܼܬܵܐ ܩܵܐ ܟܠܵܗ̇ ܒܪܝܼܬܵܐ: ܤܵܒܵܒ ܕܒܝܼܸܗ ܒܗ̇ܝ ܚܛܝܼܬܸܗ ܕܐܵܕܵܡ ܩܲܕ݇ܡܵܝܵܐ ܡܵܘܬܵܐ ܥܲܠ ܟܝܵܢܲܢ ܡܗܘܼܟܸܡܠܸܗ ܘܡܼܢ ܦܲܪܕܲܝܤܵܐ ܠܐܲܪܥܵܐ ܕܠܵܘܛܵܬܸ̈ـܐ ܦܝܼܫܠܲܢ ܡܪܘܼܦܝܸܐ: ܘܒܝܼܸܗ ܛܵܘܦܵܢܵܐ ܕܒܝܵܘܡܵܢܸ̈ܐ ܕܢܘܼܚ ܠܟܠܵܗ̇ ܐ݇ܢܵܫܘܼܬܲܢ ܡܛܘܼܠܸܩܠܸܗ: ܘܒܝܼܸܗ ܦܠܸܫܠܸܗ ܕܲܥܘܝܼܟ̰ܝܼܲܢ ܥܲܡ ܪܸܫܝܼܬܵܐ ܕܓܸܢܤܲܢ ܒܬܝܵܡܬܵܐ ܕܐܲܪܒܥܝܼ ܘܒܙܲܒܼܢܵܐ ܕܚܲܫܵܐ). ܒܲܤ ܐܸܢ ܗܲܝܘܵܢܸ̈ܐ ܡܝܘܼܩܸܪܗ݇ܘܼܢ ܠܦܲܓܼܪܵܐ ܕܡܵܪܲܢ ܘܠܵܐ ܐ݇ܟܼܸܠܗ݇ܘܼܢ ܒܸܤܪܵܐ: ܟܡܵܐ ܘܵܐܠܸܐ ܐܲܚܢܵܢ ܟܪܸ̈ܤܛܝܵܢܸܐ!!!! ܒܲܤ ܫܠܝܼܚܵܐ ܫܪܵܪܵܐ ܐ݇ܡܸܪܸܗ ܩܵܐ ܥܸܒܼܪ̈ܵܝܸܐ (ܒܲܤ ܘܵܓ̰ܸܒ ܝܼܗ݇ܘ̣ܵܐ ܕܐܲܢܸ̈ܐ ܕܝܼܢܵܐ ܕܘܼܡܝܸ̈ܐ ܕܡܸܢܕܝܼܵܢܸ̈ܐ ܕܫܡܲܝܵܐ ܦܵܝܫܝܼ ܕܘܼܟܼܝܸ̈ܐ ܒܐܲܢܸ̈ܐ: ܐܝܼܢܵܐ ܐܲܢܸ̈ܐ ܫܡܲܝܵܢܵܝܸ̈ܐ ܒܕܸܒܼܚܸ̈ܐ ܕܒܘܼܫ ܨܦܵܝ ܡܼܢ ܕܐܲܢܸ̈ܐ...ܥܸܒܼܪ̈ܵܝܸܐ 23:9)܀܀܀
ܒܝܕ ܡܫܡܫܢܐ: ܝܘܤܦ ܢܘܼܪܘܼ